Türkiyə ordusunun Afrində məhv etdiyi terrorçuların sayı 935 nəfərə çatıb – YENİLƏNİB

Bakı. 4 fevral. REPORT.AZ/ Türkiyə ordusunun Suriyanın Afrin şəhərində aparılan “Zeytun budağı” əməliyyatı çərçivəsində məhv etdiyi yaraqlıların sayı 935 nəfərə çatıb.

“Report” Türkiyə mətbuatına istinadən xəbər verir ki, bu barədə ölkə başçısı Rəcəb Tayyib Ərdoğan Vatikana getməzdən əvvəl keçirdiyi mətbuat konfransında bildirib.

Prezidentin sözlərinə görə, Türkiyə Hərbi Qüvvələri də itki verib. “Sözsüz ki, terrorizmlə mübarizədə itkilər də mümkündür. Ancaq unutmaq lazım deyil ki, qorxaqlar qələbənin nə olduğunu bilmirlər”, – deyə Ərdoğan vurğulayıb.

Türkiyə lideri diqqəti Suriyanın şimal-qərbində tankın ekipaj üzvlərinin həlak olmasına cəlb edib. Prezidentin sözlərinə görə, Ankara beş hərbi qulluqçunun həlak olması şəraitini araşdırır. Hazırda tankın vurulduğu silahın hansı ölkənin istehsalı olması müəyyənləşdirilir. 

***11:53

Türkiyə ordusu Suriyanın Afrin şəhərində aparılan “Zeytun budağı” əməliyyatı çərçivəsində daha 32 terrorçunu məhv edib və öldürülən yaraqlıların sayı 932 nəfərə çatıb.

“Report” “Hürriyet”ə istinadən xəbər verir ki, bu barədə Türkiyə silahlı qüvvələri komandanlığının məlumatında bildirilir.

Aviasiyanın zərbələri nəticəsində PKK/KCK/PYD-YPG və İŞİD terror qruplaşmalarına məxsus sığınacaq və silah-sursat anbarı kimi istifadə edilən 5 hədəfi məhv edilib.