ABŞ-ın Federal Aviasiya Administrasiyası Azərbaycanda uçuşların təhlükəsizliyinin yüksək səviyyədə təmin olunmasını təsdiq edib

Bakı. 23 may. REPORT.AZ/ İlk dəfə 2014-cü ildə ABŞ-ın Federal Aviasiya Administrasiyası (FAA) tərəfindən Azərbaycanda uçuşların təhlükəsizliyinin təmin olunması sahəsində apardığı qiymətləndirmə nəticəsində Azərbaycana “1-ci Kateqoriya” səviyyəsi verilib. 

Bu barədə “Report”a Nəqliyyat, Rabitə və Yüksək Texnologiyalar Nazirliyinin Mətbuat xidmətindən məlumat verilib.

Təqdim olunan bu səviyyəyə əsasən, Azərbaycan aviaşirkətləri ABŞ-a birbaşa müntəzəm uçuşlar həyata keçirmək hüququna malik idi.

Buna baxmayaraq, 2015-ci ildə Beynəlxalq Mülki Aviasiya Təşkilatı (İKAO) tərəfindən keçirilmiş geniş audit zamanı Beynəlxalq Standartlara uyğunluq faizinin aşağı düşməsi (58%-dən 43%-ə) FAA tərəfindən Azərbaycana verilmiş Aviasiya Təhlükəsizliyi üzrə “1-ci Kateqoriya”nın “2-ci Kateqoriya”ya endirilməsi və ABŞ-a uçuşlara məhdudiyyət qoyulması təhlükəsi yaratmışdı. Təhlükəsizlik Kateqoriyası aşağı salınan dövlətlərin təcrübəsi göstərir ki, yenidən “1-ci Kateqoriya”ya qayıtmaq prosesi çox çətin keçir və uzun illər tələb edir.

Bu baxımdan, son iki il ərzində mülki aviasiya sahəsinə dövlət nəzarətinin gücləndirilməsi istiqamətində geniş tədbirlər görülüb.

Belə ki, Azərbaycan Respublikası Prezidentinin müvafiq Fərmanı ilə “Mülki Aviasiyada Uçuşların Təhlükəsizliyi üzrə Dövlət Müfəttişliyi” yaradılıb, “Aviasiya Haqqında” Qanuna zəruri əlavələr edilib.

Eyni zamanda Mülki Aviasiya sahəsi üzrə Dövlət Proqramlarının icrası istiqamətində geniş iş aparılıb.

Bütün bu tədbirlər, Dövlət Mülki Aviasiya Agentliyi tərəfindən təşkil edilmiş iş və qəbul edilmiş qaydalar nəticəsində 2017-2018-ci illərdə keçirilən beynəlxalq auditlər, o cümlədən ABŞ-ın Federal Aviasiya Administrasiyası (FAA) tərəfindən keçirilən qiymətləndirmə müsbət nəticələnib.

Beləliklə, FAA tərəfindən Azərbaycanda “Mülki aviasiya haqqında” Çikaqo Konvensiyasının standartlarına uyğunluq qiymətləndirildikdən sonra Azərbaycan üçün uçuşların təhlükəsizliyinə nəzarət üzrə “1-ci Kateqoriya” qüvvədə saxlanılıb.

Bu, Azərbaycan Respublikası rəhbərliyinin uçuşların təhlükəsizliyinin təmin olunmasına və mülki aviasiya sahəsinin inkişafına göstərdiyi xüsusi diqqətin nəticəsidir.